དཔལ་ས་སྐྱའི་མཐོ་རིམ་སློབ་གྲྭ་ཆེན་མོ།

ངོ་སྤྲོད་དང་དམིགས་ཡུལ།
དཔལ་ས་སྐྱ་མཐོ་རིམ་སློབ་གྲྭ་ཆེན་མོའི་བྱམས་བརྩེ་དཀར་སྐྱོང་ལྷན་ཚོགས་ནི། ཕྱི་ལོ་༢༠༠༨ ལོར་འདི་གའི་སློབ་དགེ་ཉག་རོང་བ་མཁན་པོ་མཁྱེན་རབ་བཟང་པོ་མཆོག་གིས་ཐུགས་རེ་བཞིན་དབུ་བརྙེས་པ་ཞིག་ཡིན། ཚོགས་པའི་དམིགས་ཡུལ་ནི། སེམས་ཅན་སྤྱི་དང་ཉམ་ཆུང་དུད་འགྲོ་རྣམས་ཀྱི་ཚེ་སྲོག་ལ་སྲུང་སྐྱོབས་བྱ་ཆེད་ཡིན། ཡང་སྒོས་རྩ་བའི་བླ་མ་རྣམས་ཀྱིས་གཙོས་པའི་བསྟན་འཛིན་གྱི་སྐྱེས་བུ་རྣམས་སྐུ་ཚེ་བརྟན་པ་དང་། མི་རེ་རེའི་རྒྱུད་ཀྱི་བྱམས་བརྩེ་གོང་འཕེལ་གཏོང་སླད་ཡིན། 

​

ཚོགས་པ་དངོས་སུ་ཚུགས་པ།
མཐོ་སློབ་ཀྱི་སློབ་མ་ཕལ་མོ་ཆེས་བྱ་ཤ་དང་ཉ་ཤ་ལྟ་བུའི་རིགས་མི་ཚེར་སྤངས་བ་དང་། རེ་འགས་ལོ་འགར་སྤངས་བ་དང་། ལྷག་པར་དུ་དགེ་འདུན་པ་ལྔ་བཅུ་ཐམ་པས་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་སྐུ་ཚེ་བརྟན་པ་དང་། བཀའ་དྲིན་རྗེས་དྲན་ཆེད་མི་ཚེ་ཧྲིལ་པོར་དམར་ཟས་སྤངས་པར་བརྟེན། དགེ་འདུན་པ་དེ་དག་གི་མཚན་ཐོག་ནས་དཔལ་ས་སྐྱའི་མཐོ་རིམ་སློབ་གྲྭའི་བྱམས་བརྩེ་དཀར་སྐྱོང་ལྷན་ཚོགས། འདི་བཞིན་ཀུན་མཁྱེན་གོ་བོ་རམ་འབྱམས་པ་བསོད་ནམས་སེངྒེ་དགོངས་པ་གཞན་དོན་དུ་གཤེགས་པའི་དུས་ཆེན་ཉིན་དབུ་ཚུགས། ལོ་ལྟར་ཀུན་མཁྱེན་དཔྱིད་ཆོས་ཆེན་མོ་ནི་ཀུན་མཁྱེན་བླ་མའི་དགོངས་རྫོགས་དུས་ཆེན་གཅིག་པུ་མ་ཡིན་པར། བྱམས་བརྩེ་དཀར་སྐྱོང་ལྷན་ཚོགས་དབུ་བརྙེས་པའི་དུས་ཆེན་ཡང་ཡིན་ནོ།།