དཔལ་ས་སྐྱའི་མཐོ་རིམ་སློབ་གྲྭ་ཆེན་མོ།

དཔལ་ས་སྐྱ་མཐོ་རིམ་སློབ་གྲྭ་ཆེན་མོ་འདི་ནི། ༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང། ༸སྐྱབས་རྗེ་བདེ་བར་གཤེགས་པ་མཁན་ཆེན་ཨ་པད་རིན་པོ་ཆེ་རྣམ་གཉིས་ནས། ཕྱིི་ལོ་ ༡༩༧༢ ལོའི་ཕྱི་ཟླ་ ༡༢ པའི་ཚེས་ ༡༩ ཉིན་མོར་རྒྱ་གར་བྱང་ཕྱོགས་དཱེཧ་རཱ་དཱུན་མངའ་ཁུལ་མ་སུ་རིར་བྷ་ལོ་གྷན་ཇི་ Barlowganj ཞེས་པའི་ས་གནས་སུ་དབུ་བཙུགས། ཐོག་མར་ཁང་གླ་བྱས་ཏེ་ Barlowganj དང་ May Cottage གཉིས་སུ་ཁྱོན་ལོ་བརྒྱད་བསྡད། ཕྱི་ལོ་ ༡༩༨༠ ལོར་ད་ལྟའི་མཐོ་སློབ་ཆགས་ཡུལ་གྱི་ས་ཆ་འདིར་སྤོས་ཏེ་མཐོ་སློབ་ཀྱི་རྟེན་དང་བརྟེན་པ་འདི་དག་རིམ་གྲུབ་ཐུབ་པ་བྱུང་ངོ་།

 

ཐོག་མའི་ཚོགས་མི་རྣམས་ནི། ཚོགས་གཙོ་༧སྐྱབས་མགོན་༧གོང་མ་ཁྲི་ཆེན་རིན་པོ་ཆེ་དང་། ཚོགས་གཞོན་མཁན་ཆེན་ཨ་པད་རིན་པོ་ཆེ། ཚོགས་མི་༸སྐྱབས་མཆོག་བཅོ་བརྒྱད་ཁྲི་ཆེན་རིན་པོ་ཆེ། ཚོགས་མི་༧སྐྱབས་མཆོག་ངོར་ཀླུ་ལྡིང་མཁན་ཆེན་རིན་པོ་ཆེ་སོགས་ཀྱིས་མཛད། སྐབས་དེར་དཔལ་འབྱོར་ཤིན་ཏུ་སྐྱོ་པོ་ཡིན་ཀྱང། བླ་ཆེན་རྣམ་པས་དབུས་ཕྱོགས་ཚང་མས་མཐོ་སློབ་འདི་ཤིན་ཏུ་གལ་ཆེན་པོ་བརྩིས་ཏེ། མཐོ་སློབ་འདི་ལ་ཤུགས་བསྣོན་ཆེན་པོ་བསྐྱོན་ཏེ་རིམ་བཞིན་འཕེལ་རྒྱས་ཡག་པོ་བྱུང་ཞིང་བསྟན་པ་སྤྱི་དང་བྱེ་བྲག་ལ་ཧ་ཅང་ཕན་ཐོག་ཆེན་པོ་བྱུང་ཡོད། 

​