དཔལ་ས་སྐྱའི་མཐོ་རིམ་སློབ་གྲྭ་ཆེན་མོ།

གནའ་སྔ་མོ་རྒྱ་གར་འཕགས་པའི་ཡུལ་དུ་བདག་ཅག་གི་སྟོན་པ་འཁོར་དང་བཅས་པ་བསོད་སྙོམས་ལ་བརྟེན་ནས་བཞུགས་པའི་ཕྱིར་དཔལ་འབྱོར་གྱི་གནད་དོན་ཐད་དགོན་གཞུང་ནས་ཐག་གཅོད་བྱེད་དགོས་པ་ཆེར་མེད་ཀྱང་། དུས་ཚོད་འགྱུར་རིམ་བཞིན་སྤྱི་ཚོགས་ཀྱང་རིམ་གྱིས་འགྱུར་ཏེ་དེང་སང་གི་དུས་སུ་བོད་བརྒྱུད་ནང་བསྟན་གྱི་བཤད་སྒྲུབ་ཀྱི་གདན་ས་དག་ཏུ་བཞུགས་པའི་ཆོས་བྱེད་དགེ་འདུན་པ་རྣམས་ཉིན་ལྟར་བསོད་སྙོམས་ལ་འབྱོན་པའི་ཁོར་ཡུག་དང་ལམ་ལུགས་མེད་པས་ཁོང་དག་གི་འཚོ་བ་ནི་དགོན་པའི་འཛིན་སྐྱོང་པ་དང་དཔལ་འབྱོར་འདུ་དགོད་པ་སོགས་ཀྱིས་ཐབས་ཤེས་བྱས་ཏེ་བསླབ་པ་སློབ་གཉེར་ལ་མཐུན་འགྱུར་བྱེད་པའི་ལམ་སྲོལ་ཡོད་པ་ལྟར། གདན་ས་ཆེན་པོ་འདིའི་འཚོ་ཚིས་ཀྱི་འགྲོ་སྟངས་ཡང་དེ་ལས་མ་འདས་པས་འདི་གའི་དཔལ་འབྱོར་གྱི་ཡོང་ཁུངས་དང་འགྲོ་ཁུངས་གཤམ་གསལ།

​

ཡོང་ཁུངས་ནི། གདན་ས་ཆེན་པོ་འདིར་འཚོ་བའི་ཡོང་ཁུངས་དེ་སྔོན་ཚོང་ལས་སོགས་མེད་ཅིང་སློབ་གྲྭ་ཆེན་པོ་གཞན་ལྟར་སློབ་ཡོན་ལེན་པའི་ལུགས་སྲོལ་ཡང་མེད་པས་གཙོ་བོར་དད་སྦྱིན་ཁག་གི་རོགས་སྐྱོར་ལ་བརྟེན་རྒྱུ་ཡིན་ལ། དེ་ཡང་འདི་གའི་ལས་ཁུངས་དང་མཁན་རབས་སྔ་མ་རྣམས་དང་འབྲེལ་བ་ཟབ་པའི་སྦྱིན་བདག་རྣམས་ཀྱི་རོགས་སྐྱོར་ནར་མར་ཡོད་ཐོག ད་ལྟའི་དཔལ་འབྱོར་འདུ་དགོད་པ་མཁན་པོ་བསྟན་དར་ལགས་དང་མཁན་པོ་རྣམ་པས་རྒྱལ་ཕྱི་ནང་གི་དད་སྦྱིན་ཁག་ལ་འབྲེལ་ལམ་བཙུགས་ཏེ་རོགས་སྐྱོར་དང་མཆོད་འབུལ་བྱུང་བ། གཙོ་བོ་སིང་ག་པུར་ས་སྐྱ་བསྟན་འཕེལ་གླིང་གི་མཐུན་འགྱུར་འོག་འདི་གའི་དགེ་འདུན་པ་ལྔ་དྲུག་རེ་ལོ་ལྟར་སིངྒ་པུར་དང་མ་ལེ་ཤ་སོགས་སུ་སྦྱིན་བདག་རྣམས་ཀྱི་ལོ་གསར་པའི་ཞབས་རིམ་སྒྲུབ་ཁར་ཕེབས་སྐབས་བྱུང་བའི་ཞལ་འདེབས། རྒྱུན་དུ་འདིར་སྐྱབས་རྟེན་དང་བསྔོ་རྟེན་བྱུང་བ་བཅས་སོ། །མཁན་ཆེན་ཨ་པད་རིན་པོ་ཆེ་ཞལ་སྔ་ནས་ཞལ་བཀོད་དང་མ་རྩ་གནང་བ་བཞིན་འཛུགས་སྐྲུན་གནང་བའིི་གསོལ་མགྲོན་འདི་ནི་བཤད་གྲྭའི་འཚོ་བའི་ཡོང་ཁུངས་གཙོ་བོ་དེ་ཡིན། སྔར་རྒྱུན་བཤད་གྲྭ་གཞུང་ངམ་འདི་གའི་སློབ་ཕྲུག་སྒེར་པ་གང་ལ་རོགས་སྐྱོར་དང་མཆོད་འབུལ་ཞལ་འདེབས་གནང་འདོད་ཡོད་རིགས་མཆིས་ཚེ། ལས་ཁུངས་དང་འདི་གའི་མཁན་པོ་རྣམ་པ་གང་ལ་འབྲེལ་བ་གནང་ན་འཐུས་ལ། རོགས་སྐྱོར་དང་མཆོད་འབུལ་སོགས་གང་ཡིན་ཡང་འདི་ཙམ་ཞེས་པའི་ཚད་བཀག་ངེས་ཅན་མེད་པས་སོ་སོའི་འདོད་མོས་ལྟར་གནང་ཆོག་ཅིང་། ང་ཚོ་འཛིན་སྐྱོང་པའི་ངོས་ནས་རྗེས་སུ་ཡི་རང་དང་བཅས་འདི་གའི་དགེ་སློབ་ཡོངས་ཀྱི་ཚབ་བྱས་རེ་ཐུགས་རྗེ་ལེགས་འབུལ་ཞུ་རྒྱུ་ཡིན།

​

འགྲོ་ས་གཙོ་བོ་ནི། གཙོ་བོ་དགེ་སློབ་ཡོངས་ཀྱི་ཞལ་ལག་དང་ལས་བྱེད་པའི་གླ་ཆ། ད་དུང་སློབ་གཉེར་བ་རེར་ཟླ་རེར་རོགས་དངུལ་ཧིན་སྒོར་༢༠༠ རེ་དང་དབྱར་ཁའི་གུང་སེང་སྐབས་ལམ་གྲོན་གྱི་དོད་ཧིན་སྒོར་༧༥༠༠ ཐམ་པ་རེ། དེ་བཞིན་གདན་ས་ཆེན་པོ་འདིའི་ཕྱི་ནང་གི་ཉམས་གསོ་དང་འཕེལ་རྒྱས་ཀྱི་ཆེད་གཏོང་དགོས་པའང་ཡོད་པས་མདོར་ན་ལོ་རེར་ཨ་སྒོར། ༥༤,༦༡༢ (USD 54,612) ལྷག་ཙམ་ཏེ། དེ་ལྟར་དད་སྦྱིན་ཁག་གིས་ཇི་ཙམ་ཕུལ་བ་ཐམས་ཅད་སློབ་གཉེར་བ་དག་དང་གདན་ས་འདི་ཁོ་ནའི་ཆེད་དུ་ནར་གཏོང་གནང་མཛད་པ་ལས་ཆུད་ཟོས་སུ་སྐར་གང་ཙམ་ཡང་མི་འགྲོ་བ་གནང་བཞིན་པའོ།།